പാച്ചുവിന്‍റെ ലോകം

മുല്ലപ്പെരിയാർ

2012-02-09T10:32:00.000+04:00

മുല്ലപ്പെരിയാർ ഇഷ്യൂ ചാനലുകളിൽ നിറഞ്ഞ് നിന്നിരുന്ന സമയത്താണ് വീട്ടിൽ ചാനലൊക്കെ പോയിക്കിട്ടിയത്... പിന്നീട് കഴിഞ്ഞ വരമാണ് വീണ്ടും ചാനലുകൾ കിട്ടിത്തുടങ്ങിയത്... ഇന്നലെ രാത്രി ന്യൂസ് കാണുമ്പോൾ പാച്ചു അടുത്ത് വന്നിരുന്ന്...

'ഉപ്പാ... ഇപ്പോ മുല്ലപ്പെരിയാറിനെ പറ്റിയൊന്നും കേക്കുന്നില്ലല്ലോ!'

എനിക്ക് പറയാൻ ഇടതരാതെ അവൾ തന്നെ ഉത്തരവും കണ്ടെത്തി...

'ചെലപ്പോ നമ്മള്‌ക്ക് ചാനലില്ലാതിരുന്ന സമയത്ത് അതൊക്കെ ശരിയാക്കീണ്ടാവും...'

സ്പീഡ്

2011-07-10T10:26:00.000+04:00

അപ്പ പീഡീ പോ... പീഡീ പോ...
അപ്പ അപ്പറത്തിരിക്ക്... ഇഞ്ഞാവ ഇപ്പറത്ത്...

തർജ്ജമ:
ഉപ്പ സ്പീഡിൽ പോ... സ്പീഡിൽ പോ...
ഉപ്പ അങ്ങട്ട് മാറിയിരിക്ക്... ഞാനോടിച്ചോളാം

[ആച്ചിയുടെ ലോകം]

സുല്ലിട്ട പടങ്ങള്‍: സൌഹൃദം

2011-07-09T10:25:00.001+04:00

http://sulphoto.blogspot.com/2011/07/blog-post.html

ഹാപ്പി ബര്‍ത്ത് ഡേ

2011-06-25T01:11:00.000+04:00

ഇന്ന് ഞങ്ങളുടെ പാച്ചുമോളുടെ ഏഴാം ജന്മദിനം...

ഹാപ്പി ബര്‍ത്ത് ഡേ പാച്ചൂ...

നിറഞ്ഞ സ്നേഹത്തോടെ

ഉപ്പ

ഉമ്മ

ആച്ചിമോള്‍

harvesting...

2011-06-16T17:01:00.000+04:00

പേരുമാറ്റം...

2011-06-11T14:54:00.000+04:00

ചിലപ്പോൾ പഠിപ്പിക്കുന്ന സമയത്തായിരിക്കും പാച്ചുവിന്റെ മറ്റ് കലാപരിപാടികൾ... പഠിപ്പിൽ നിന്നും ശ്രദ്ധ പോവുന്ന പാച്ചുവിനെ വിളിച്ച് കൊണ്ടേയിരിക്കണം...

'പാച്ചൂ...'

'പറഞ്ഞ് പറഞ്ഞ് ബോറഡിച്ച് തൊടങ്ങി... ഇവൾടെ പേരു മാറ്റിയാലോ...' പാച്ചൂന്റെ ഉമ്മാടെ ഉച്ചത്തിലുള്ള ആത്മഗതം...

'എന്നാ പിന്നെ *പറഞ്ഞെഴുതെടീ* എന്ന് പേരിട്ടാ മതി...' പുതിയ പേരു പെട്ടെന്ന് തന്നെ നിർദ്ദേശിച്ചു പാച്ചു...

ഈഈഈ...

2011-04-23T10:26:00.000+04:00

"ആച്ചിമോളിങ്ങനെ വെറുതെ ഈഈഈന്ന് കരഞ്ഞോണ്ടിരുന്നാ അപ്പ ഓഫീസീ പോവും"

"അപ്പ പോണ്ട, ഇഞ്ഞാവ ഈഈ... വെക്കൂല്ലാ..."

[ലേബൽ: പാച്ചുവിന്റെ ലോകം, ആച്ചിയുടേയും]

Exercise

2011-02-08T21:56:00.000+04:00

True or False
ചോദ്യം: Mr. Majid cooks very tasty food
പാച്ചുവിന്റെ ഉത്തരം: False, ഉപ്പാടെ കാര്യത്തില്‍ ഇത് True ആണല്ലോ...

* * * * * * * *

Question - Answer
ചോദ്യം: How many meals do you have in a day?
പാച്ചുവിന്റെ ഉത്തരം: We have three meals in a day, ഉപ്പാക്ക് പക്ഷെ four or five times ആണല്ലോ...

പാച്ചുകാന്തി

2011-01-27T10:51:00.000+04:00

കഴിഞ്ഞ ദിവസം സ്കൂളില്‍ നടന്ന ഫാന്‍സി ഡ്രസ്സ് മത്സരത്തില്‍ പാച്ചുവും പങ്കെടുത്തു :)

പാച്ചുവിന്റെ വരകളും നിറങ്ങളും

2011-01-21T09:04:00.000+04:00

aachimol & team @ dubai global village

2010-12-18T11:22:00.002+04:00

ആച്ചിമോളേ... ആപ്പീ റ്റൂ യൂ...

2010-11-30T10:06:00.003+04:00

"ഉമ്മാ... ഇവള്‍ക്കും കൂടെ ഒരുണ്ണി വാവനെ പ്രസവിച്ച് കൊടുക്കണം... എല്ലാം വലിച്ചിട്ട് ഇവളെ ബുദ്ധിമുട്ടിക്കുന്ന ഒരു ഉണ്ണിവാവനെ..."

http://pachutty.blogspot.com/2010/08/blog-post.html

താത്തയെ കൊണ്ട് ഇങ്ങിനെ പറയിപ്പിച്ച താത്താടെ വാവയും താത്തയും...

* * * * * * *

രണ്ട് വര്‍ഷം മുമ്പ് ഇതേ ദിവസം ഓഫീസില്‍ നിന്ന് എന്നത്തേതിലും വൈകി വീട്ടിലെത്തുമ്പോള്‍ മണി ഒമ്പത് കഴിഞ്ഞിരുന്നു... തണ്ടലിന് കൈ കൊടുത്ത് കൊണ്ട് മുനീറ വാതില്‍ തുറന്നു...

'എന്താ പെയിനുണ്ടോ... ഹോസ്പിറ്റലില്‍ പോവാം...'

'അത്രയ്ക്ക് ആയിട്ടില്ല... ഇക്ക ഭക്ഷണം കഴിക്ക്...'

ഭക്ഷണം കഴിഞ്ഞതും ഇനി ഹോസ്പിറ്റലില്‍ പോവാമെന്ന് അവള്‍ തന്നെ പറഞ്ഞു... വലിയ ട്രാഫിക്കിലൊന്നും പെടാതെ ഷാര്‍ജ അല്‍ ഖാസിമി ഹോസ്പിറ്റലിലെത്തുമ്പോള്‍ സമയം പത്തരയായിരിക്കുന്നു... എന്നേയും പാച്ചുമോളേയും വെളിയിലിരുത്തി അവളെ അകത്തേക്ക് കൊണ്ടുപോയി... പതിനൊന്ന് ഇരുപത്തിയഞ്ചിന് ആച്ചിമോളെത്തിയ വിവരം നഴ്സ് ഞങ്ങളെ അറിയിച്ചു... കുറച്ച് കഴിഞ്ഞപ്പോള്‍ ആച്ചിമോളെ ഞങ്ങള്‍ക്കരുകിലേക്ക് കൊണ്ട് തന്നു...

വാവ വന്നാല്‍ അവളുടെ കയ്യില്‍ കൊടുക്കണമെന്ന പാച്ചുവിന്റെ മുങ്കൂട്ടിയുള്ള ആവശ്യം ഞാന്‍ അംഗീകരിച്ച് കൊടുത്തു...

ഇന്ന് ഞങ്ങളുടെ ആച്ചിമോള്‍ക്ക് രണ്ട് വയസ്സ് തികയുന്നു... ആച്ചിമോളേ... ആപ്പീ റ്റൂ യൂ... :)

മാതൃരാജ്യം

2010-11-21T13:58:00.002+04:00

'ഭാരതമെന്നാല്‍ പാരിന്‍ നടുവില്‍ കേവലമൊരു പിടി മണ്ണല്ല,
ജനകോടികള്‍ നമ്മെ നാമായ് മാറ്റിയ ജന്മഗൃഹമല്ലോ'

ഇത്രയും തെറ്റു കൂടാതെ പാടിയതിനൊപ്പം പാച്ചു ഒരു ചോദ്യം കൂടെ ചോദിച്ചു...

"ഉപ്പാ, ഞാന്‍ ജനിച്ചതും വളര്‍ന്നതും ജീവിക്കുന്നതും ഇവിടെയല്ലേ... അപ്പോ ഇതല്ലേ എന്റെ രാജ്യം...? ഉപ്പയും ഉമ്മയും ഇന്ത്യക്കാരായത് കൊണ്ട് മാത്രല്ലേ ഞാന്‍ ഇന്ത്യക്കാരിയായത്...?!"

ലിവിംഗ് തിങ്ങ്സ്

2010-09-21T09:19:00.001+04:00

പാച്ചു: ഉമ്മാ, ബലൂണ്‍ ലിവിംഗ് തിങ്ങ്സാണോ?

ഉമ്മ: അല്ല, ബലൂണ്‍ ലിവിംഗ് തിങ്ങ്സല്ല...

പാച്ചു: പിന്നെന്തിനാ ബലൂണില്‍ കാറ്റ് നിറയ്ക്കുന്നത്?!

ഞാന്‍ (ആത്മഗതം): അമ്പടി, ഇതിനായിരുന്നല്ലേ എന്നെക്കൊണ്ട് ഇന്ന് നിര്‍ബന്ധിച്ച് ബലൂണ്‍ വാങ്ങിപ്പിച്ചത്...

ഈ പ്രേതം എവിടുന്ന് വന്നു

2010-09-18T13:24:00.002+04:00

പാച്ചു: ഉപ്പാ, ശരിക്കും ഈ പ്രേതമൊക്കെ ഉള്ളതാണോ...?

ഞാന്‍ : ഇല്ല മോളൂ, പ്രേതമൊന്നും ശരിക്കുള്ളതൊന്നുമല്ല...

പാച്ചു: പിന്നെങ്ങിനെ ഈ പ്രേതം എന്ന വേഡുണ്ടായി...? ഇല്ലാത്ത സാധനത്തിനെങ്ങിനെ പേരു വന്നു?!

ഒരു ആത്മഗതവും റിക്വസ്റ്റും

2010-08-26T13:24:00.002+04:00

കളറിങ്ങ് ചെയ്യുമ്പോഴാണെങ്കിലും പഠിക്കുമ്പോഴാണെങ്കിലും കളിക്കുമ്പോഴാണെങ്കിലും അതിലിടയ്ക്ക് കയറി പാച്ചുവിനെ പരമാവധി ബുദ്ധിമുട്ടിക്കുന്ന കാര്യത്തില്‍ ആച്ചി വളരെ നന്നായി ശ്രദ്ധ കൊടുക്കാറുണ്ട്...

ഒരു ചിത്രത്തിന് കളര്‍ കൊടുത്ത് തീരുമ്പോഴേക്കും ചുരുങ്ങിയത് മൂന്നു നാലു തവണയെങ്കിലും പാച്ചുവിന് കളര്‍ പെന്‍സിലുകളും കടലാസും എടുത്ത് ഇടം മാറിയിരിക്കേണ്ടി വരാറുണ്ട്...

ഒടുക്കം സഹികെട്ട് പാച്ചുവിന്റെ ആത്മഗതം വളരെ ഉച്ചത്തില്‍ തന്നെ പുറത്ത് വന്നു...

"ഇത് വലുതായാല്‍ ഇതിനെ കൊണ്ട് ഇത്രേം ശല്യം ഉണ്ടാവ്വുന്ന് വിചാരിച്ചിരുന്നില്ല..."

ഒപ്പം ഉമ്മാട് ഒരു റിക്വസ്റ്റും...

"ഉമ്മാ... ഇവള്‍ക്കും കൂടെ ഒരുണ്ണി വാവനെ പ്രസവിച്ച് കൊടുക്കണം... എല്ലാം വലിച്ചിട്ട് ഇവളെ ബുദ്ധിമുട്ടിക്കുന്ന ഒരു ഉണ്ണിവാവനെ..."

I dad is bad

2010-03-17T11:31:00.007+04:00

ചുമര്‍ നിറയെ പാച്ചുവിന്റെ വരകളാണ്... അതിനിടയ്ക്കെന്തോ എഴുതിയിരിക്കുന്നത് ഇന്ന് രാവിലെയാണ് ശ്രദ്ധയില്‍ പെട്ടത്... അതിതായിരുന്നു...

എന്നോ വഴക്ക് കേട്ടപ്പോള്‍ അവള്‍ സങ്കടം തീര്‍ത്തതാണ്...

ഞാനിന്നത് കണ്ട വിവരം അവളോട് പറഞ്ഞ് പരിഭവിച്ചു... അവളത് അപ്പോള്‍ തന്നെ വെട്ടി... പകരം my dad is good എന്ന് ചുമരില്‍ പലയിടത്തും എഴുതി...

എന്നിട്ടും തൃപ്തിവരാതെയാവണം...

ഞാനോഫിസിലേക്കിറങ്ങുമ്പോള്‍ ഒരു തുണ്ട് കടലാസും കൂടെ കയ്യില്‍ തന്നു അവള്‍...

I love u dad - my dad is good

തേഡ് പ്രൈസ് വിന്നര്‍

2010-02-13T18:11:00.002+04:00

സ്കൂളില്‍ ഓട്ടമത്സരത്തില്‍ പാച്ചുവിനായിരുന്നു ക്ലാസ്സില്‍ മൂന്നാം സ്ഥാനം...

അങ്ങനെ ഞങ്ങടെ തറവാട്ടിലേക്ക് ആദ്യമായി ഒരു മെഡല്‍ കടന്നു വന്നിരിക്കുന്നു... :)

താത്ത മെഡല്‍ വാങ്ങിക്കുന്നതിനും മുമ്പ് തന്നെ അടുത്തുണ്ടായിരുന്നു ഒരു കുട്ടിയുടെ ഉമ്മാടെ കയ്യില്‍ നിന്നും മെഡല്‍ വാങ്ങി ആച്ചി അത് സ്വയം കഴുത്തിലണിഞ്ഞിരുന്നു... :)

ഉണ്ണികൾക്കുണ്ണിപ്പുര പണിയാനെന്തിനു കുറ്റിമടലുകൾ...

2009-11-30T11:12:00.006+04:00

കസേരകളും പുതപ്പും വെച്ച് പാച്ചു പണിത ഉണ്ണിപ്പുര ബാങ്ക്

അവിടെ ഇടപാടിനായ് വന്നിരിക്കുന്ന ആച്ചി...

പാച്ചുവിന് കളിക്കാൻ ആച്ചി കൂട്ടായ് വന്നിട്ടിന്നേക്കൊരു വർഷം തികയുന്നു.

എല്ലാ കുഞ്ഞുങ്ങളിലും സർവ്വശക്തന്റെ അനുഗ്രഹങ്ങളുണ്ടായിരിക്കട്ടെ...

പാച്ചുവിന്റെ ചില വിശേഷങ്ങളും ആപ്പീ റ്റൂയൂവും

2009-06-25T08:52:00.027+04:00

കല്യാണത്തെ പറ്റി പറയാന്ന് വെച്ചാൽ നൂറ് നാവാ പാച്ചൂന്...

പാച്ചു: ഉമ്മാ, എന്നെ എപ്പഴാ കല്യാണം കഴിപ്പിക്കാ...
ഉമ്മ: പാച്ചു പഠിച്ച് വലിയ കുട്ടിയൊക്കെയായി ജോലിയൊക്കെ കിട്ടിയിട്ട്...
പാച്ചു: അപ്പഴ്ക്കും ഉപ്പാക്കും ഉമ്മാക്കും വയസ്സാവില്ലേ?
ഉമ്മ: ആവും ഉപ്പാക്കും ഉമ്മാക്കും വയസ്സാവും...
പാച്ചു: വയസ്സായാ ഉപ്പേം ഉമ്മേം മരിച്ച് പോവില്ലേ...
ഉമ്മ: വയസ്സായാ എല്ലാരും മരിച്ച് പോവും...
പാച്ചു: എന്നാ പിന്നെ കൊറച്ച് നേരത്തെ എന്നെ കല്യാണം കഴിപ്പിച്ചൂടെ...

* * * * *

പാച്ചു: ഉമ്മാ, ഉമ്മാടെ ഈ മോതിരത്തിന് എത്ര ദിർഹംസായി...
ഉമ്മ: എന്തിനാ പാച്ചു...
പാച്ചു: എനിക്ക് വലുതായിട്ട് എന്റെ ഭർത്താവിനെ കൊണ്ട് വാങ്ങിപ്പിക്കാനാ...
ഉമ്മ: പാച്ചൂന് വേണെങ്കി ഉപ്പാട് പറഞ്ഞാ പോരേ, ഉപ്പ വാങ്ങിത്തരില്ലേ...
പാച്ചു: ഭാർത്താവ് വാങ്ങിത്തരുമ്പോ അതൊരു രസല്ലേ... കണ്ടില്ലേ ഉപ്പ ഉമ്മാക്ക് വാങ്ങിത്തരണത്...

* * * * *

പാച്ചു: ഉമ്മാ എന്നെ ഇപ്പോ തന്നെ കല്യാണം കഴിപ്പിച്ചൂടെ
ഉമ്മ: ഇപ്പോ പാച്ചൂനെ കെട്ടിച്ചാൽ ഉപ്പാനേം ഉമ്മാനേം ചെക്കന്റെ ഉപ്പാനേം ഉമ്മാനെം പോലീസ് പിടിച്ച് ജയിലിലിടും
പാച്ചു: ഞങ്ങളെ ജയിലിലിടില്ലല്ലോ... അത് മതി.

=================================

പാച്ചുവിനെ ഹോം വർക്ക് ചെയ്യിക്കാൻ ഒത്ത് കിട്ടുന്ന സന്ദർഭങ്ങൾ കുറവാണ്... ഈ ചെറിയ ക്ലാസ്സുകളിലല്ലേ നമ്മളെക്കൊണ്ട് അതിനൊക്കെ കഴിയൂ എന്നതിനാൽ കിട്ടുന്ന അവസരങ്ങൾ ഞാൻ കളയാറുമില്ല :)

‘പശു നമുക്ക് പാൽ തരും, പാലിൽ നിന്നും....’
പിക്ച്ചർ കൺവർസേഷൻ പാച്ചു മലയാളത്തിൽ പറഞ്ഞ് തുടങ്ങി...
ഞാൻ: പാച്ചു ഇംഗ്ലീഷിൽ പറയ്...
പാച്ചു: ഇംഗ്ലീഷിൽ ഞാൻ ക്ലാസ്സിൽ പറഞ്ഞോളാം
ഇത് ഉപ്പാക്ക് മനസ്സിലാവാൻ വേണ്ടി മലയാളത്തീ പറഞ്ഞതാ...

* * * * * *

ഒൻപതല്ലല്ലോ ഒട്ടല്ലേ വേണ്ടത്, തൊണ്ണൂറല്ലല്ലോ ഒൻപതല്ലേ, തൊള്ളായിരമല്ലല്ലോ തൊണ്ണൂറല്ലേ... ചെറുപ്പം മുതലേ എന്നെ പിടി കൂടിയിരുന്ന സംശയങ്ങളാണ്... ഇപ്പോഴിതാ പാച്ചുവും അതാവർത്തിക്കുന്നു.

ഒന്ന് മുതൽ ഇരുപത് വരെയാണ് ഫസ്റ്റ് ടേമിൽ പഠിപ്പിക്കുന്നത്...
വൺ, ടു... ..... ...... തേർട്ടീൻ, ഫോർട്ടീൻ, ഫിഫ്റ്റീൻ... ഫിഫ്റ്റീനെത്തിയപ്പോൾ പാച്ചുവിന് സംശയം.
‘ഉപ്പാ... ഫിഫ്റ്റീനല്ലല്ലോ വേണ്ടത്... ഫൈവ്റ്റീനല്ലേ...’

==============================

ഇന്ന് ജൂൺ 25, ഇതുപോലെ ഒരു ജൂണ്‍ ഇരുപത്തിയഞ്ചിനായിരുന്നു ഈ പാച്ചുക്കുട്ടിയെ ഞങ്ങൾക്ക് കിട്ടിയത്... ഇന്നേക്ക് അഞ്ച് വർഷം തികയുന്നു... കാലം അതിന്റെ ടോപ്പ് ഗിയറിൽ പായുന്നു!

ഇത്തവണ ബർത്ത്ഡേയ്ക്ക് താത്താക്ക് കൂട്ടായി പാച്ചൂന്റെ കുഞ്ഞാവ കൂടിയുണ്ട്...

...ഇവടെ ഞാനൂണ്ട്... ട്ടോ...

ചതി

2009-06-07T09:02:00.001+04:00

പാച്ചുവിന്റെ വികൃതിക്ക് തടയിടാന്‍ ഉമ്മയൊരു നമ്പറിട്ടു...

'പാച്ചു ഉമ്മാട് ചെയ്യുന്നത് പോലെ തന്നാവും പാച്ചൂന്റെ മക്കളും പാച്ചൂനോട് ചെയ്യുക...'

'അപ്പോ ഞാനഹമ്മദി കാണിച്ചാ ന്റെ മക്കളും അഹമ്മദി കാണിക്ക്വോ'... പാച്ചുവിന് വ്യക്തമാക്കിയേ പറ്റൂ

'അതെ, പാച്ചു നല്ല കുട്ട്യായാല്‍ പാച്ചൂന്റെ മക്കളും നല്ല കുട്ട്യേളായിരിക്കും...' ഉമ്മ വിശദമാക്കി

'അപ്പോ ഉമ്മ ചെറുപ്പത്തില് അഹമ്മദ്യായിരുന്നോ...' പാച്ചുവിന്റെ ന്യായമായ സംശയം

'ആ... ഉമ്മാക്കും അത്യാവശ്യം വികൃതിയൊക്കെണ്ടായിരുന്നു...' ഉമ്മ കീഴടങ്ങി...

'...ന്നാലും ഇന്നോടീ ചതി വേണ്ടായിരുന്നു... അതോണ്ടല്ലേ ഞാനഹമ്മദി കാണിക്കുന്നത്...'

പാച്ചുവിന്റെ സങ്കടം പറഞ്ഞാ തീരുമോ :)

പാച്ചു

2009-03-17T12:49:00.004+04:00

രാജിവെച്ച മന്ത്രി ശ്രീ. മാത്യു ടി തോമസ് വീട്ടില്‍ ചെന്ന് കയറുന്ന നേരത്ത് മക്കള്‍ അദ്ദേഹത്തെ സ്വീകരിക്കുന്ന രംഗമാണ് വാര്‍ത്തയില്‍...

'ഇക്കാ നോക്ക്...' പാച്ചുവിനെ ചൂണ്ടി ഭാര്യ പറഞ്ഞു...

പാച്ചുവിന്റെ മുഖത്ത് ഭയങ്കര സന്തോഷവും ചിരിയും... അച്ഛന്റേയും മക്കളുടേയും ആ അടുപ്പം, അവളത് ശരിക്കും ആസ്വദിക്കുകയാണെന്ന് ഞങ്ങള്‍ക്ക് തോന്നി...

'പാച്ചു എന്തിനാ ചിരിക്കുന്നത്...' അതേ പറ്റി പാച്ചു എന്തു പറയും എന്നറിയാനായി പാച്ചൂന്റെ ഉമ്മ ചോദിച്ചു...

'ഉമ്മാ... ആ കുട്ടിക്കെത്ര മുട്യാ...'

(മുടി തഴച്ച് വളരുന്ന കാര്യം പറഞ്ഞാണ് കുറച്ചെങ്കിലും പച്ചക്കറി പാച്ചുന്റെ വയറ്റിലോട്ട് ചെല്ലുന്നത്)

* * * * * *

'പാച്ചൂന് ഇന്നലത്തേക്ക് നാലര വയസ്സായി...'

കാലത്തിന്റെ വേഗത്തെക്കുറിച്ച് ആശ്ചര്യപ്പെടുകയായിരുന്നു ഞങ്ങള്‍...

അടുത്തിരുന്ന പാച്ചുവിന്റെ സംശയം...

'അപ്പോ ഇന്നോ?'

* * * * * *

അമ്മിഞ്ഞ കുടിക്കുന്ന വാവ ഇടയ്ക്കിടെ താത്താനെ നോക്കും ചിരിക്കും, വീണ്ടും അമ്മിഞ്ഞ നുണയും... ഇതാവര്‍ത്തിച്ച് കൊണ്ടിരുന്നപ്പോള്‍ താത്തയുടെ ഡയലോഗ്...

'നീ വല്യെ ഗെമൊന്നും കാണിക്കണ്ട... ഞാന്‍ കുടിച്ചേന്റെ ബാക്ക്യാണ് നീ കുടിക്കുന്നത്'

പാച്ചു: മൂന്നു ചിത്രങ്ങള്‍

2009-01-29T10:38:00.005+04:00

മൈന

ഉപ്പ

ആകാശം

ദയ

2009-01-22T13:46:00.000+04:00

പാച്ചൂന്റെ സൈക്കിളിനു ചില്ലറ പണി... അതു ശരിയാക്കിക്കാന്‍ പോയതായിരുന്നു ഞാനും പാച്ചുവും. സൈക്കിള്‍ റിപ്പയറു ചെയ്തു കിട്ടാന്‍ കുറച്ച് സമയമെടുക്കും അപ്പോഴേക്കും നമുക്കൊന്ന് നടന്നിട്ടു വരാമെന്നു പറഞ്ഞു ഞാന്‍.

'ഉപ്പ വേണെങ്കി പൊയ്ക്കോ... ഞാന്‍ ഇവടെ ഇരിക്കാം... ആരെങ്കിലും സൈക്കിളു കൊണ്ടായാലോ...'

'പാച്ചു ഒറ്റയ്ക്കിവിടെ ഇരിക്കുമ്പോ പാച്ചൂനെ ആരെങ്കിലും പിടിച്ചോണ്ട് പോയാലോ...'

'അവരെ ഞാന്‍ ഇടിച്ച് നിലത്തിട്ട് ഇങ്ങനെ ചവിട്ടും...'

'ന്നിട്ട്...' ഞാന്‍ ചോദിച്ചു...

'അവര് ഒന്നും ചെയ്യല്ലേന്ന് പറഞ്ഞ് കരഞ്ഞാ... ഞാനവരെ വെറുതെ വിടും...'

കാര്യം നിസ്സാരം, പ്രശ്നം ഗുരുതരം... ശേഷം സ്ക്രീനില്‍

2008-12-29T15:28:00.003+04:00

ഒരുണ്ണിവാവ വേണമെന്നതായിരുന്നു പാച്ചുവിന്റെ ആദ്യകാല ആവശ്യം...
ഉണ്ണിവാവ വരുന്നു എന്നറിഞ്ഞതില്‍ പിന്നെ ഉണ്ണിവാവകളുടെ എണ്ണമായിരുന്നു പ്രശ്നം...

'കണ്ടില്ലേ ഉപ്പാക്കൊക്കെ എത്ര കൊച്ചുപ്പാരാ... എനിക്കും വേണം കൊറേ ഉണ്ണ്യേള്...'
അവള്‍ക്ക് ന്യായീകരണം ഉണ്ടായിരുന്നു. ഇന്‍സ്പെക്ടര്‍ ഗരുഡിലെ ഒരു പാട്ടുസീനില്‍ ദിലീപ് ഒരു ബസ്സ് നിറയെ കുഞ്ഞുങ്ങളുമായി വന്നിറങ്ങുന്നത് കണ്ടപ്പോള്‍...

'ഞാനും ഉണ്ണ്യാവേളും അങ്ങനെ വരും' എന്നും പറഞ്ഞ് അവള്‍ അതിനടിവരയിടേം ചെയ്തിരുന്നു...

പുതിയ വാവ വന്നതിനു ശേഷം പാച്ചൂന്റെ ഉമ്മ ചോദിച്ചു...
'മോള്‍ക്ക് കുഞ്ഞാവയെ കിട്ട്യേപ്പൊ സന്തോഷായില്ലേ... ഇനി വേറെ കുഞ്ഞാവ വേണ്ടല്ലോ...'

പാച്ചു നയതന്ത്രപരമായി ഇടപെട്ടു...
'എനിക്ക് സന്തോഷായി... പക്ഷെ ഇവള്‍ക്കിനി കുഞ്ഞാവ വേണംന്ന് പറയാണെങ്കി ചെലപ്പോ പ്രസവിച്ച് കൊടുക്കേണ്ടി വരും...'

നക്ഷത്രത്തിളക്കം

2008-12-25T07:49:00.002+04:00

ഇന്നലെ ഓഫീസിലേക്ക് വിളിച്ച് പാച്ചു പറഞ്ഞു...
'ഉപ്പാ എനിക്ക് ക്രിസ്മസ്സ് കാണണം...'
'ഇനി നാട്ടീ പോകുമ്പോ കാണിച്ചു തരാട്ടാ...' ഞാന്‍ സമാധാനിപ്പിച്ചു...
ഗ്രാമത്തില്‍ കാസവിളക്കുകളുമേന്തി വീടുകള്‍ തോറും പാട്ടുപാടി കയറിയിറങ്ങുന്ന സംഘങ്ങളായിരുന്നു എന്റെ മനസ്സില്‍...
പക്ഷെ അവള്‍ക്കത് പോരായിരുന്നു... ഈ ക്രിസ്മസ് തന്നെ കാണണം...
ഒരു കടലാസു നക്ഷത്രവും ഒരു കുഞ്ഞുബള്‍ബും ഞാന്‍ വീട്ടിലേക്ക് തിരിക്കുമ്പോള്‍ കരുതിയിരുന്നു... തല്‍ക്കാലം ക്രിസ്മസ് അവള്‍ക്കതില്‍ കാണിച്ചുകൊടുക്കാമെന്ന് വെച്ചു...
'ഇതെന്താപ്പാ...'
സ്വാഭാവീകമായ ആകാംക്ഷയില്‍ കവിഞ്ഞൊന്നും അവളുടെ മുഖത്ത് കണ്ടില്ല...
ഞാന്‍ നക്ഷത്രമൊക്കെ തയ്യാറാക്കി... വീട്ടിലെ എല്ലാ വിളക്കുകളും അണച്ച് നക്ഷത്രത്തിലെ വിളക്ക് തെളിച്ചു...
ഹോ... എന്തായിരുന്നു ഒരു തിളക്കമെന്നോ...
വീട്ടില്‍ ഒരു കടലാസു നക്ഷത്രം തെളിഞ്ഞപ്പോള്‍ പാച്ചുവിന്റെ കണ്ണില്‍ മാനത്തെ മുഴുവന്‍ താരങ്ങളും തിളങ്ങിയിരുന്നു...

എല്ലാവര്‍ക്കും സ്നേഹത്തോടെ ക്രിസ്മസ് ആശംസകള്‍ നേരുന്നു...
അഗ്രജന്‍, മുനീറ, പാച്ചു & ആച്ചു :)

പാച്ചുവിന്‍റെ ഉണ്ണിവാവ വന്നു :)

2008-12-03T09:13:00.000+04:00

:)
കഴിഞ്ഞ ഞായറാഴ്ച (30-11-2008)
രാത്രി 11:25ന് ഞങ്ങളുടെ കുടുംബത്തിലേക്ക്
ഒരാള്‍ കൂടെ വന്നുചേര്‍ന്നു...
പാച്ചുവിനൊരു ഉണ്ണിവാവ...
ഉമ്മയും മോളും സുഖമായിരിക്കുന്നു...
സര്‍വ്വശക്തനു സ്തുതി...

രണ്ട് മണി

2008-09-18T10:20:00.004+04:00

കുറ്റിമടല്‍ കൊണ്ട് ഉണ്ണിപ്പുരയുണ്ടാക്കലും പീടികയുണ്ടാക്കി കച്ചവടം നടത്തലുമൊക്കെ കുട്ടിക്കാലത്തെ ഒഴിച്ചു കൂടാനാവാത്ത ചില ഇനങ്ങളായിരുന്നു. കുറ്റിമടല്‍ കിട്ടിയില്ലെന്ന് കരുതി കുഞ്ഞു മനസ്സുകള്‍ക്ക് മാറ്റം വരില്ലല്ലോ!

തലാണകളും സോഫയുടെ കുഷ്യനുകളും കുത്തനെ നിറുത്തി മുറികള്‍ തിരിച്ച് വീടുണ്ടാക്കിയും ഗ്രോസറിയൊരുക്കിയും പാച്ചു അവളുടെ കുട്ടിക്കാലം സജീവമാക്കുന്നു... കുട്ടിമനസ്സുകള്‍ക്കെന്തിനാ കുറ്റിമടല്‍!

തകൃതിയായി നടക്കുന്ന കച്ചവടത്തിനിടയില്‍ പാച്ചുന്‍റെ ഉമ്മ എന്തോ വാങ്ങിക്കാനെത്തി...

‘ഇതിനെന്താ വെല...’

‘രണ്ട് മണി...’

‘രണ്ട് മണ്യാ... അതിനുമ്മ സമയല്ലല്ലോ ചോദിച്ചത്...’

‘മണീ... മണീ...’ തള്ളവിരലും ചൂണ്ടുവിരലും തമ്മില്‍ ചേര്‍ത്ത് തിരുമ്മി പാച്ചു പറഞ്ഞു...

മണ്ണില്‍ കളിച്ചൊരു അവധിക്കാലം

2008-09-02T10:15:00.001+04:00

ഇക്കഴിഞ്ഞ അവധിക്കാലത്ത് പാച്ചുവിന് മണ്ണില്‍ കളിക്കാനാവാതെ പോയെങ്കിലും കഴിഞ്ഞ തവണ അങ്ങിനെ ആയിരുന്നില്ല... പാച്ചുവിന് കൂട്ടായി എന്‍റെ നാലാമത്തെ അനിയനും... മണ്ണില്‍ കളിക്കാന്‍ അവനിത്രേം ആവേശം കാണുമെന്ന് ഞാനറിഞ്ഞില്ല :)

അങ്ങനെ ഒരവധിക്കാലം തീര്‍ന്നു

2008-08-31T11:47:00.007+04:00

തിരക്കൊഴിഞ്ഞ ഒരു ദിവസം ഓഫീസിലേക്ക് കൂടെ കൂട്ടിയപ്പോള്‍ പാച്ചു ചോദിച്ചു...

‘ഉപ്പാടെ ഓഫീസില്‍ മണ്ണുണ്ടോ...’

‘ഇല്ല... ഓഫീസില്‍ മണ്ണുണ്ടാകില്ല...’

‘മണ്ണുണ്ടെങ്കി എനിക്ക് മണ്ണീ കളിക്കായിരുന്നു...’‍

മണ്ണിലും മഴയത്തും വെയിലത്തും ഒന്നും കളിക്കാതെ

പാച്ചുവിന്‍റെ ആദ്യ സ്കൂള്‍ അവധിക്കാലം തീര്‍ന്നു...

കടലില്‍ കുളിച്ചതും കടല്‍ക്കരയില്‍ മണ്ണുമാന്തിക്കളിച്ചതും

പാച്ചു ആസ്വദിച്ചിരിക്കും - ഞാനെന്നെ ആശ്വസിപ്പിക്കുന്നു!

പാച്ചു തന്ന സമ്മാനം

2008-08-10T14:56:00.004+04:00

‘ദാ ...പ്പാക്കൊരു സമ്മാനം...’
ഓഫീസില്‍ നിന്നും വീട്ടിലെത്തിയ എനിക്ക് പാച്ചു ഒരു കവര്‍ നീട്ടി...
അതിലൊരു ചെറിയ കാര്‍ഡില്‍ പാച്ചു ഇത്രയും ചെയ്തു വെച്ചിരുന്നു...

‘ഇതൊക്കെ എന്താ മോളേ...’ ഞാന്‍ ചോദിച്ചു...
‘മരം, കെണര്‍... പിന്നെ ഐസ്ക്രീം...’ പാച്ചു വിശദീകരിച്ചു!

എലഫന്‍റ് & പകല്‍

2008-07-07T11:19:00.008+04:00

മലയാളം പഠിക്കുന്ന ആവേശത്തിലാണ് പാച്ചു...

പഠിപ്പിച്ച് കൊടുക്കാത്തതിനാണ് പരാതി...

മലയാളം അക്ഷരങ്ങളും അവയിലാരംഭിക്കുന്ന ചിത്രങ്ങളും ഉള്‍പ്പെടുത്തി ഒരു ബുക്ക് ഞാന്‍ തന്നെ തയ്യാറാക്കി കൊടുത്തിട്ടുണ്ട്...

പാച്ചു അ എന്നെഴുതി... എന്നിട്ട് പടം നോക്കി പറഞ്ഞു... അ ഫോര്‍ അമ്മ...

ആ... കൂടെ എഴുതി പാച്ചു...
ഒപ്പം പടം നോക്കി പറഞ്ഞു... ആ ഫോര്‍ എലഫന്‍റ്

* * * * * * *

രാത്രിയില്‍ കൂട്ടുകാരന്‍ അബ്ദുള്‍ മന്നാന്‍ കളിക്കാന്‍ വിളിച്ചപ്പോള്‍ പാച്ചു പറഞ്ഞു...

‘ഐ പകല്‍ കം...’ ഞാന്‍ പകല്‍ വരാം എന്നുതന്നെയാണ് പാച്ചു ഉദ്ദേശിച്ചത്...

പക്ഷെ അബ്ദുള്‍ മന്നാന്‍ അവളെ ഒന്നിരുത്തി നോക്കി...

കാരണം അബ്ദുള്‍ മന്നാന് മലയാളം അറിയില്ലായിരുന്നു...

പകരം അവനറിയുന്നത് ഹിന്ദിയായിരുന്നു...

ഉപ്പ വേണെങ്കി...

2008-07-03T09:49:00.003+04:00

ഇടയ്ക്കൊരു തോന്നല്‍ വരുമ്പോള്‍ ഞാന്‍ പാച്ചൂനൊരു വടി കൊടുക്കും, എന്നിട്ട് സുന്ദരമായി നല്ല അടി വാങ്ങിക്കും... ദേ ഒരു സാമ്പിള്‍...

മങ്കിയുടേം ഡോങ്കിയുടേം പടങ്ങള്‍ കാണിച്ച് അവയെ പറ്റി വിശദീകരിച്ചതിന്‍റെ കൂട്ടത്തില്‍ ഞാനൊരു ചോദ്യം ചുമ്മാ ചോദിച്ചു...

‘പാച്ചുവിന് മങ്കിയാവാണോ ഡോങ്കിയാവണോ...’

‘ഇക്ക് പാച്ചുവായാ മതി... ഉപ്പ വേണെങ്കി ഡോങ്ക്യായിക്കോ...’ എനിക്ക് നിമ്മതിയായി...

(ഹോ... കെട്ട്യോള് പെരുന്നാള്‍ വന്ന പോലല്ലേ ചിരിച്ചോണ്ടിരുന്നത്)

[പാച്ചൂന് കൊടുത്ത അതേ വടി ഇവിടെ വെക്കുന്നു... ഉപയോഗിക്കുന്നവര്‍ ക്യൂ പാലിക്കുക]

എന്‍ഐഎഫ്ഇ

2008-06-29T09:14:00.005+04:00

മഴ നനഞ്ഞ് ബൈക്കില്‍ വരുന്ന അച്ഛനും മകനും,
അരികിലൂടെ കടന്നു പോകുന്ന കാര്‍ നോക്കി നെടുവീര്‍പ്പിടുന്ന മകന്‍
‘എന്‍ ഐ എഫ് ഇ യില്‍ പഠിച്ചാല്‍ നിനക്കും ഇതുപോലെയാകാം...’ ആശ്വസിപ്പിക്കുന്ന അച്ഛന്‍.

NIFE യുടെ പരസ്യം ടീവിയില്‍.

‘ഉമ്മാ... ഉപ്പാനെ നമ്മക്ക് എന്‍ ഐ എഫില്‍ പഠിപ്പിക്കാം...’

പാച്ചുവും ആശ്വസിച്ചു...

പൊന്നുമോളെ SSC തന്നെ കടക്കാന്‍ പെട്ട പാട് - എന്‍റെ ആത്മഗതം...

ജൂണ്‍ 25

2008-06-25T09:55:00.005+04:00

ഒരു ക്യാമറ വളരെ കാലമായുള്ള സ്വപ്നമായിരുന്നു...
പക്ഷെ അതു സഫലമാകാന്‍ പാച്ചു ജനിക്കുന്നതു് വരെ കാത്തിരിക്കേണ്ടി വന്നു.
മോളുടെ കളിയും ചിരിയും കരച്ചിലും എല്ലാം പകര്‍ത്തി വെക്കാന്‍ ഒരു ക്യാമറ...
അങ്ങിനെ ഒരു 3.2 മെഗാപിക്സല്‍ ക്യാമറ സ്വന്തമായി.

പിന്നീടു് ഭാര്യ നല്‍കിയ പിറന്നാള്‍ സമ്മാനത്തിന്‍റെ രൂപത്തില്‍ അതു 6 മെഗാപിക്സലിലേക്കു മാറി. പക്ഷെ, അതുകൊണ്ടു് കൂടുതല്‍ കഷ്ടപ്പെട്ടതു് നിങ്ങള്‍ ബൂലോഗ വാസികളായിരുന്നു എന്നതു വേറെ കാര്യം. വീട്ടിലെ ചട്ടി, കലം, പച്ചക്കറി, ടോയു്, വാട്ടര്‍ ബോട്ടില്‍... ഇത്യാദി വസ്തുക്കള്‍ പോസ്റ്റുകളായി വന്നു നിങ്ങളെ പരീക്ഷിച്ചു കൊണ്ടിരുന്നു.

എന്നെ കണ്ടാണല്ലോ പാച്ചു വളരുന്നതു്...

‘ഉപ്പാ എനിക്കു് ഫോട്ടോ എടുക്കണം...’ അവളുടെ ആവശ്യം...
‘ആയ്ക്കോട്ടെ...’ ഞാന്‍ സമ്മതിച്ചു...
‘എനിക്കു് കത്തിയുടെ ഫോട്ടോ എടുക്കണം...’
ടേബിളിലിരുന്ന കത്തിയെ ചൂണ്ടി അവള്‍ ആവശ്യപ്പെട്ടു...
(കസേരയിലിരുന്ന എന്നെ ചൂണ്ടിക്കാണിക്കാത്തതു് ഭാഗ്യം)
‘ഇനി ജാം...’
‘ഇനി ഗ്ലാസ്സ്...’
‘.........’
‘.........’
‘ഇക്ക ക്യാമറയിലാക്കാന്‍ ബാക്കിയുള്ളതൊക്കെ ഇവള്‍ എടുക്കുംന്നു് തോന്നുന്നു...’
പാച്ചുവിന്‍റെ പടം പിടുത്തം തുടരുന്നതിലിടയ്ക്കു് ഭാര്യയുടെ കമന്‍റ്...

‘ഉപ്പാ ഈ പൂവ്വിന്‍റെ ഫോട്ടോ കൂടെ എടുക്കട്ടെ...’
ക്യാമറ തിരിച്ചു് ചോദിച്ചപ്പോള്‍ പാച്ചുവിന്‍റെ ആവശ്യം...
പാച്ചു പിടിച്ച ആ പൂവ്വിന്‍റെ പോട്ടം ദേ... താഴെ...

പാച്ചുവിന്‍റെ ഒരു പാടു അസുലഭ നിമിഷങ്ങള്‍ ഉള്ളില്‍ പകര്‍ത്തി വെച്ച ക്യാമറയെ ചെറിയ രീതിയിലെങ്കിലും ഉപയോഗിക്കാന്‍ കഴിയുന്ന കുട്ടിയായി കഴിഞ്ഞിരിക്കുന്നു പാച്ചു.

അങ്ങിനെ പാച്ചുവിന്‍റെ പടം പിടുത്തം കഴിഞ്ഞു വന്നപ്പോഴേക്കും ക്ലോക്കിലെ സൂചി രാത്രി പന്ത്രണ്ടുമണിയില്‍ നിന്നും കടന്നു് 2008 ജൂണ്‍ 25നു തുടക്കം കുറിച്ചിരുന്നു...
ഞങ്ങളുടെ ജീവിതത്തിലേക്കു് പാച്ചു കടന്നു വന്ന ജൂണ്‍ 25

ഗ്രാജുവേഷന്‍ ക്യാപ്

2008-06-16T14:57:00.001+04:00

‘ഇതെന്താ’

ഒരു കുട്ടി, ഗ്രാജുവേഷന്‍ ക്യാപ് വെച്ച് നില്‍ക്കുന്ന പടത്തില്‍ തൊട്ട് പാച്ചു ചോദിച്ചു.

‘അത് പഠിച്ച് വലുതായി ഡിഗ്രിയൊക്കെ എടുക്കുമ്പോള്‍ കിട്ടുന്നതാണ്...’ ഉമ്മാടെ വിശദീകരണം.

‘അതിന് ഇത് ചെറിയ കുട്ടിയല്ലേ... മീശയൊന്നും ഇല്ലല്ലോ...’ പാച്ചുവിന് പിന്നേയും സംശയം.

ശരിയാണ്, അതിലെ കുട്ടി വലുതാവുന്നതിനെ പറ്റി സ്വപ്നം കാണുന്ന ചിത്രമായിരുന്നു അത്.

‘ഇത് ആ കുട്ടി പഠിച്ച് വലുതാവുന്നത് സ്വപ്നം കാണുന്നതാണ്...’ ഉമ്മയുടെ വിശദീകരണം കൊണ്ട് പാച്ചു തൃപ്തയായി.

* * * * *

‘സ്കൂളിലൊക്കെ പോയി പഠിച്ചിട്ട് വേണ്ടെ മോള്‍ക്കും ആ കുട്ടിയെ പോലെ തൊപ്പിയൊക്കെ വെക്കാന്‍...’
രാവിലെ സ്കൂളില്‍ പോവാനുള്ള പതിവ് മടി കാണിച്ച പാച്ചുവിനോട് നല്ലപാതി പറഞ്ഞു...

‘സ്കൂളീ പോണ്ട, എനിക്കും അതുപോലെ സ്വപ്നം കണ്ടാ മതി...’
പാച്ചുവിനാണോ മറുപടിക്ക് പഞ്ഞം...

ലെഗ് ഇന്‍ ദ പാന്‍റ്

2008-06-02T14:34:00.006+04:00

രണ്ട് മാസാവാറായി പാച്ചുവിന്‍റെ സ്കൂള്‍ ജീവിതം തുടങ്ങിയിട്ട്.
സ്കൂളില്‍ പോകാനൊക്കെ നല്ല ഇഷ്ടം.
എങ്കിലും എന്നും രാവിലെ ഒരു ചിണുങ്ങലുണ്ട്...
‘ന്ന് സ്കൂളീ പോണ്ടാ...’
പക്ഷെ, യൂണിഫോമിട്ടാല്‍ പിന്നെ ആള് ഫോമിലായി.

പഠിക്കാനും ഹോം വര്‍ക്ക് ചെയ്യാനും ഒക്കെ നല്ല ഉഷാര്‍.
ചിലപ്പോള്‍ സ്കൂളില്‍ നിന്നും വന്ന പാടെ ഹോം വര്‍ക് തീര്‍ത്ത് വെക്കും.
ഒരു ദിവസം മടക്കയാത്രയില്‍ ബസ്സില്‍ വെച്ച് തന്നെ ഹോം വര്‍ക് ചെയ്ത് വന്നു.
അതെന്തിനാ അങ്ങനെ ചെയ്തതെന്ന ചോദ്യത്തിന് കിട്ടിയ മറുപടി...

‘ഉമ്മാനെക്കൊണ്ട് തൊള്ളടീപ്പിക്കണ്ടാന്ന് വിചാരിച്ച് ബസ്സീന്നെന്നെ ചെയ്ത്...’

പഠിച്ച ഇംഗ്ലീഷ് വാക്കുകള്‍ കിട്ടുന്ന അവസങ്ങളിലെല്ലാം അയല്പക്കത്തെ കൂട്ടുകാരുടെ മേല്‍ പ്രയോഗിക്കും, ഇടയ്ക്ക് ഞങ്ങള്‍ക്കിട്ടും...

ഞാനും നല്ലപാതിയും എന്തോ സംസാരിച്ച് കൊണ്ടിരിക്കുന്നതിലിടയ്ക്കാണ് പാച്ചു പറയുന്നത്...

‘ലെഗ് ഇന്‍ ദ പാന്‍റ്...’

പാച്ചു പറഞ്ഞത് മനസ്സിലാവാതെ ഞാന്‍ ചോദിച്ചു

‘എന്താ മോളേ... എന്താ വേണ്ടത്...’

‘ലെഗ് ഇന്‍ ദ പാന്‍റ്...’ പാച്ചു ആവര്‍ത്തിച്ചു

കാര്യം മനസ്സിലാകാതെ മുഖത്തോട് മുഖം നോക്കുന്ന ഞങ്ങളെ നോക്കി പാച്ചു ഒച്ച വെച്ചു...

‘പാന്‍റിട്ട് തരാന്...’