ഉണ്ണികൾക്കുണ്ണിപ്പുര പണിയാനെന്തിനു കുറ്റിമടലുകൾ...

കസേരകളും പുതപ്പും വെച്ച് പാച്ചു പണിത ഉണ്ണിപ്പുര ബാങ്ക്


അവിടെ ഇടപാടിനായ് വന്നിരിക്കുന്ന ആച്ചി...


പാച്ചുവിന് കളിക്കാൻ ആച്ചി കൂട്ടായ് വന്നിട്ടിന്നേക്കൊരു വർഷം തികയുന്നു.

എല്ലാ കുഞ്ഞുങ്ങളിലും സർവ്വശക്തന്റെ അനുഗ്രഹങ്ങളുണ്ടായിരിക്കട്ടെ...

പാച്ചുവിന്റെ ചില വിശേഷങ്ങളും ആപ്പീ റ്റൂയൂവും

കല്യാണത്തെ പറ്റി പറയാന്ന് വെച്ചാൽ നൂറ് നാവാ പാച്ചൂന്...

പാച്ചു: ഉമ്മാ, എന്നെ എപ്പഴാ കല്യാണം കഴിപ്പിക്കാ...
ഉമ്മ: പാച്ചു പഠിച്ച് വലിയ കുട്ടിയൊക്കെയായി ജോലിയൊക്കെ കിട്ടിയിട്ട്...
പാച്ചു: അപ്പഴ്ക്കും ഉപ്പാക്കും ഉമ്മാക്കും വയസ്സാവില്ലേ?
ഉമ്മ: ആവും ഉപ്പാക്കും ഉമ്മാക്കും വയസ്സാവും...
പാച്ചു: വയസ്സായാ ഉപ്പേം ഉമ്മേം മരിച്ച് പോവില്ലേ...
ഉമ്മ: വയസ്സായാ എല്ലാരും മരിച്ച് പോവും...
പാച്ചു: എന്നാ പിന്നെ കൊറച്ച് നേരത്തെ എന്നെ കല്യാണം കഴിപ്പിച്ചൂടെ...

* * * * *

പാച്ചു: ഉമ്മാ, ഉമ്മാടെ ഈ മോതിരത്തിന് എത്ര ദിർഹംസായി...
ഉമ്മ: എന്തിനാ പാച്ചു...
പാച്ചു: എനിക്ക് വലുതായിട്ട് എന്റെ ഭർത്താവിനെ കൊണ്ട് വാങ്ങിപ്പിക്കാനാ...
ഉമ്മ: പാച്ചൂന് വേണെങ്കി ഉപ്പാട് പറഞ്ഞാ പോരേ, ഉപ്പ വാങ്ങിത്തരില്ലേ...
പാച്ചു: ഭാർത്താവ് വാങ്ങിത്തരുമ്പോ അതൊരു രസല്ലേ... കണ്ടില്ലേ ഉപ്പ ഉമ്മാക്ക് വാങ്ങിത്തരണത്...

* * * * *

പാച്ചു: ഉമ്മാ എന്നെ ഇപ്പോ തന്നെ കല്യാണം കഴിപ്പിച്ചൂടെ
ഉമ്മ: ഇപ്പോ പാച്ചൂനെ കെട്ടിച്ചാൽ ഉപ്പാനേം ഉമ്മാനേം ചെക്കന്റെ ഉപ്പാനേം ഉമ്മാനെം പോലീസ് പിടിച്ച് ജയിലിലിടും
പാച്ചു: ഞങ്ങളെ ജയിലിലിടില്ലല്ലോ... അത് മതി.

=================================

പാച്ചുവിനെ ഹോം വർക്ക് ചെയ്യിക്കാൻ ഒത്ത് കിട്ടുന്ന സന്ദർഭങ്ങൾ കുറവാണ്... ഈ ചെറിയ ക്ലാസ്സുകളിലല്ലേ നമ്മളെക്കൊണ്ട് അതിനൊക്കെ കഴിയൂ എന്നതിനാൽ കിട്ടുന്ന അവസരങ്ങൾ ഞാൻ കളയാറുമില്ല :)

‘പശു നമുക്ക് പാൽ തരും, പാലിൽ നിന്നും....’
പിക്ച്ചർ കൺവർസേഷൻ പാച്ചു മലയാളത്തിൽ പറഞ്ഞ് തുടങ്ങി...
ഞാൻ: പാച്ചു ഇംഗ്ലീഷിൽ പറയ്...
പാച്ചു: ഇംഗ്ലീഷിൽ ഞാൻ ക്ലാസ്സിൽ പറഞ്ഞോളാം
ഇത് ഉപ്പാക്ക് മനസ്സിലാവാൻ വേണ്ടി മലയാളത്തീ പറഞ്ഞതാ...

* * * * * *

ഒൻപതല്ലല്ലോ ഒട്ടല്ലേ വേണ്ടത്, തൊണ്ണൂറല്ലല്ലോ ഒൻപതല്ലേ, തൊള്ളായിരമല്ലല്ലോ തൊണ്ണൂറല്ലേ... ചെറുപ്പം മുതലേ എന്നെ പിടി കൂടിയിരുന്ന സംശയങ്ങളാണ്... ഇപ്പോഴിതാ പാച്ചുവും അതാവർത്തിക്കുന്നു.

ഒന്ന് മുതൽ ഇരുപത് വരെയാണ് ഫസ്റ്റ് ടേമിൽ പഠിപ്പിക്കുന്നത്...
വൺ, ടു... ..... ...... തേർട്ടീൻ, ഫോർട്ടീൻ, ഫിഫ്റ്റീൻ... ഫിഫ്റ്റീനെത്തിയപ്പോൾ പാച്ചുവിന് സംശയം.
‘ഉപ്പാ... ഫിഫ്റ്റീനല്ലല്ലോ വേണ്ടത്... ഫൈവ്റ്റീനല്ലേ...’

==============================

ഇന്ന് ജൂൺ 25, ഇതുപോലെ ഒരു ജൂണ്‍ ഇരുപത്തിയഞ്ചിനായിരുന്നു ഈ പാച്ചുക്കുട്ടിയെ ഞങ്ങൾക്ക് കിട്ടിയത്... ഇന്നേക്ക് അഞ്ച് വർഷം തികയുന്നു... കാലം അതിന്റെ ടോപ്പ് ഗിയറിൽ പായുന്നു!



ഇത്തവണ ബർത്ത്ഡേയ്ക്ക് താത്താക്ക് കൂട്ടായി പാച്ചൂന്റെ കുഞ്ഞാവ കൂടിയുണ്ട്...

...ഇവടെ ഞാനൂണ്ട്... ട്ടോ...

ചതി

പാച്ചുവിന്റെ വികൃതിക്ക് തടയിടാന്‍ ഉമ്മയൊരു നമ്പറിട്ടു...

'പാച്ചു ഉമ്മാട് ചെയ്യുന്നത് പോലെ തന്നാവും പാച്ചൂന്റെ മക്കളും പാച്ചൂനോട് ചെയ്യുക...'

'അപ്പോ ഞാനഹമ്മദി കാണിച്ചാ ന്റെ മക്കളും അഹമ്മദി കാണിക്ക്വോ'... പാച്ചുവിന് വ്യക്തമാക്കിയേ പറ്റൂ

'അതെ, പാച്ചു നല്ല കുട്ട്യായാല്‍ പാച്ചൂന്റെ മക്കളും നല്ല കുട്ട്യേളായിരിക്കും...' ഉമ്മ വിശദമാക്കി

'അപ്പോ ഉമ്മ ചെറുപ്പത്തില് അഹമ്മദ്യായിരുന്നോ...' പാച്ചുവിന്റെ ന്യായമായ സംശയം

'ആ... ഉമ്മാക്കും അത്യാവശ്യം വികൃതിയൊക്കെണ്ടായിരുന്നു...' ഉമ്മ കീഴടങ്ങി...

'...ന്നാലും ഇന്നോടീ ചതി വേണ്ടായിരുന്നു... അതോണ്ടല്ലേ ഞാനഹമ്മദി കാണിക്കുന്നത്...'

പാച്ചുവിന്റെ സങ്കടം പറഞ്ഞാ തീരുമോ :)

പാച്ചു

രാജിവെച്ച മന്ത്രി ശ്രീ. മാത്യു ടി തോമസ് വീട്ടില്‍ ചെന്ന് കയറുന്ന നേരത്ത് മക്കള്‍ അദ്ദേഹത്തെ സ്വീകരിക്കുന്ന രംഗമാണ് വാര്‍ത്തയില്‍...

'ഇക്കാ നോക്ക്...' പാച്ചുവിനെ ചൂണ്ടി ഭാര്യ പറഞ്ഞു...

പാച്ചുവിന്റെ മുഖത്ത് ഭയങ്കര സന്തോഷവും ചിരിയും... അച്ഛന്റേയും മക്കളുടേയും ആ അടുപ്പം, അവളത് ശരിക്കും ആസ്വദിക്കുകയാണെന്ന് ഞങ്ങള്‍ക്ക് തോന്നി...

'പാച്ചു എന്തിനാ ചിരിക്കുന്നത്...' അതേ പറ്റി പാച്ചു എന്തു പറയും എന്നറിയാനായി പാച്ചൂന്റെ ഉമ്മ ചോദിച്ചു...

'ഉമ്മാ... ആ കുട്ടിക്കെത്ര മുട്യാ...'

(മുടി തഴച്ച് വളരുന്ന കാര്യം പറഞ്ഞാണ് കുറച്ചെങ്കിലും പച്ചക്കറി പാച്ചുന്റെ വയറ്റിലോട്ട് ചെല്ലുന്നത്)

* * * * * *

'പാച്ചൂന് ഇന്നലത്തേക്ക് നാലര വയസ്സായി...'

കാലത്തിന്റെ വേഗത്തെക്കുറിച്ച് ആശ്ചര്യപ്പെടുകയായിരുന്നു ഞങ്ങള്‍...

അടുത്തിരുന്ന പാച്ചുവിന്റെ സംശയം...

'അപ്പോ ഇന്നോ?'

* * * * * *

അമ്മിഞ്ഞ കുടിക്കുന്ന വാവ ഇടയ്ക്കിടെ താത്താനെ നോക്കും ചിരിക്കും, വീണ്ടും അമ്മിഞ്ഞ നുണയും... ഇതാവര്‍ത്തിച്ച് കൊണ്ടിരുന്നപ്പോള്‍ താത്തയുടെ ഡയലോഗ്...

'നീ വല്യെ ഗെമൊന്നും കാണിക്കണ്ട... ഞാന്‍ കുടിച്ചേന്റെ ബാക്ക്യാണ് നീ കുടിക്കുന്നത്'

പാച്ചു: മൂന്നു ചിത്രങ്ങള്‍

മൈന


ഉപ്പ


ആകാശം

ദയ

പാച്ചൂന്റെ സൈക്കിളിനു ചില്ലറ പണി... അതു ശരിയാക്കിക്കാന്‍ പോയതായിരുന്നു ഞാനും പാച്ചുവും. സൈക്കിള്‍ റിപ്പയറു ചെയ്തു കിട്ടാന്‍ കുറച്ച് സമയമെടുക്കും അപ്പോഴേക്കും നമുക്കൊന്ന് നടന്നിട്ടു വരാമെന്നു പറഞ്ഞു ഞാന്‍.

'ഉപ്പ വേണെങ്കി പൊയ്ക്കോ... ഞാന്‍ ഇവടെ ഇരിക്കാം... ആരെങ്കിലും സൈക്കിളു കൊണ്ടായാലോ...'

'പാച്ചു ഒറ്റയ്ക്കിവിടെ ഇരിക്കുമ്പോ പാച്ചൂനെ ആരെങ്കിലും പിടിച്ചോണ്ട് പോയാലോ...'

'അവരെ ഞാന്‍ ഇടിച്ച് നിലത്തിട്ട് ഇങ്ങനെ ചവിട്ടും...'

'ന്നിട്ട്...' ഞാന്‍ ചോദിച്ചു...

'അവര് ഒന്നും ചെയ്യല്ലേന്ന് പറഞ്ഞ് കരഞ്ഞാ... ഞാനവരെ വെറുതെ വിടും...'

കാര്യം നിസ്സാരം, പ്രശ്നം ഗുരുതരം... ശേഷം സ്ക്രീനില്‍

ഒരുണ്ണിവാവ വേണമെന്നതായിരുന്നു പാച്ചുവിന്റെ ആദ്യകാല ആവശ്യം...
ഉണ്ണിവാവ വരുന്നു എന്നറിഞ്ഞതില്‍ പിന്നെ ഉണ്ണിവാവകളുടെ എണ്ണമായിരുന്നു പ്രശ്നം...

'കണ്ടില്ലേ ഉപ്പാക്കൊക്കെ എത്ര കൊച്ചുപ്പാരാ... എനിക്കും വേണം കൊറേ ഉണ്ണ്യേള്...'
അവള്‍ക്ക് ന്യായീകരണം ഉണ്ടായിരുന്നു. ഇന്‍സ്പെക്ടര്‍ ഗരുഡിലെ ഒരു പാട്ടുസീനില്‍ ദിലീപ് ഒരു ബസ്സ് നിറയെ കുഞ്ഞുങ്ങളുമായി വന്നിറങ്ങുന്നത് കണ്ടപ്പോള്‍...

'ഞാനും ഉണ്ണ്യാവേളും അങ്ങനെ വരും' എന്നും പറഞ്ഞ് അവള്‍ അതിനടിവരയിടേം ചെയ്തിരുന്നു...

പുതിയ വാവ വന്നതിനു ശേഷം പാച്ചൂന്റെ ഉമ്മ ചോദിച്ചു...
'മോള്‍ക്ക് കുഞ്ഞാവയെ കിട്ട്യേപ്പൊ സന്തോഷായില്ലേ... ഇനി വേറെ കുഞ്ഞാവ വേണ്ടല്ലോ...'

പാച്ചു നയതന്ത്രപരമായി ഇടപെട്ടു...
'എനിക്ക് സന്തോഷായി... പക്ഷെ ഇവള്‍ക്കിനി കുഞ്ഞാവ വേണംന്ന് പറയാണെങ്കി ചെലപ്പോ പ്രസവിച്ച് കൊടുക്കേണ്ടി വരും...'